Sunday, April 20, 2008

ഏതു ചായയാ കുടിക്ക്യാ

ചായ ചായ ചായ . ലോപിച്ച് ചാ ആയി മാറി . ഇതു ശീതളപാനീയമല്ല. ഉണര്‍വും ഉന്മേഷവും നല്കുന്ന ഒരു ചൂടു പാനീയം . ഉറക്കപ്പിച്ചു മാറ്റുന്ന മീഡിയം . ക്ഷീണം മാറ്റി ഉണര്‍വു നല്കുന്ന പാനീയം . ചിലര്‍ക്ക്‌ മലബന്ധം മാറ്റി ഉഷാറേകുന്ന ചൂടു ജലം . അധികം ചൂടില്ലാത്ത കട്ടന്‍ ചായയില്‍ ചെറുനാരങ്ങ നീര് ഒഴിച്ച് കുടിച്ചാല്‍ വയറിളക്കവും നിര്‍ത്താം . കൂടുതല്‍ ഒരേ ജോലി ചെയ്തു മടുക്കുമ്പോള്‍ പുനരാവേശം നല്കുന്ന കാണാന്‍ അഴകുള്ള ആവി പൊങ്ങുന്ന മനം കവരുന്ന മണമുള്ള ചൂടു പാനീയം ചായ . തണുപ്പും കുളിരും മാറ്റാനുള്ള ഒരു ഒറ്റ മൂലി. ഇതിന്റെ രുചി അറിയാത്തവര്‍ വളരെ വിരളമായിരിക്കും . സുപ്രഭാതത്തിന്‍െറ അലാറം . അതാണ് ചായ . കിഴക്ക് വെള്ള കീറുംപോള്‍ മിക്ക വീട്ടിലും അടുക്കളയുടെ ഉത്ഘാടന മഹാമഹം നടത്തുന്നത് ചായ ഉണ്ടാക്കാന്‍ തീ കത്തിച്ചല്ലേ . ക്ഷേത്രങ്ങളില്‍ പൂജാദികര്‍മങ്ങള്‍ക്കുമുന്‍പ് ഗണപതിഹോമത്തിന് വിളക്ക് കൊളുത്തുന്നത് പോലെ . ഉത്കൃഷ്ടം തന്നെയല്ലേ . സുപ്രഭാതത്തില്‍ ചുടുവാര്‍ത്തയോടെ പത്രം ഇടതുകയ്യില്‍ , ചൂടു ചായ ഗ്ലാസ്സോ കപ്പോ വലത്തു കയ്യില്‍ , കണ്ണ് പേപ്പറില്‍ , ആവി പൊങ്ങുന്ന ചായ ചുണ്ടില്‍ പലവട്ടം , ചായ തീര്‍ന്നു, പേപ്പറിലെ പ്രധാന വാര്‍ത്തയും . എന്തൊരു സുഖം. തുടക്കം മനോഹരം , മുഴുവന്‍ ദിവസവും ഉഗ്രന്‍ .
ചായയുടെ മഹിമ നോക്കു . ഗൃഹത്തില്‍ ആരെങ്ങിലും സുഹൃത്തോ വിരുന്നുകരോ ആഗമിച്ചാല്‍ ഒരു കപ്പു ചായ സത്കരിച്ചു വാര്‍ത്താവിനിമയം നടത്തുന്നു . ആഗതരെ ആദരിക്കുവാനും ചായ ഉത്തമം .
വിവാഹ ചടങ്ങിനോടൊപ്പം ടീ പാര്‍ട്ടി കേട്ടിട്ടില്ലേ. എത്ര വിഭവങ്ങള്‍ ഉണ്ടെങ്കിലും ചായയുടെ പേരിനല്ലേ പ്രാധാന്യം. എല്ലാ പ്രധാന മീറ്റിങ്ങുകളിലും ചായ സത്കാരം കാണും . കാലം മാറിയപ്പോള്‍ ശീതളപാനീയമായി എങ്കിലും , ചായയുടെ ഗമ കുറഞ്ഞിട്ടോന്നും ഇല്ല. ചായക്ക്‌ തീരുമാനങ്ങള്‍ എടുക്കുന്നതിനു ഉത്തേജനം നല്‍കാനും കഴിയും .സര്‍ക്കാര്‍ ലവലിലും രാജ്യങ്ങള്‍ തമ്മിലും എത്രയോ തീരുമാനങ്ങള്‍ ചായ സത്കാരത്തിലുടെ ഉടംബടിയിലെത്തിയിട്ടുണ്ട് . ഹോട്ടലില്‍ ലഘു ഭക്ഷണത്തിന്റെ വിരാമം ചായയല്ലേ . ചായയുടെ ഓര്‍ഡര്‍ എടുത്താല്‍ പിന്നെ ബില്ല് വരും . അത് തന്നെ . വേറൊന്നും വേണോ എന്ന് ചോദിക്കില്ല . പല കമ്പനികളിലും രാവിലെയും ഉച്ചക്കുശേഷവും ഓരോ ടീ ബ്രേക്ക് ഉണ്ട് . ടീ കുടിച്ചാലും ഇല്ലെന്‍കിലും . ചായ അഥവാ ടീ എന്ന പേരിനു ഒരു ക്രെഡിററ് ഉണ്ട് . എന്തൊരു പ്രാധാന്യം . പാലും മധുരവും ഇല്ലാത്ത ചായ ച്ചണ്ടി റോസിനു നല്ല വളമാണ് കെട്ടോ . ഊണിനെപോലെ രണ്ടുനേരം മാത്രം എന്ന് ശാഠ്യം പിടിക്കാതെ ഇടക്കിടെ സേവിക്കാവുന്ന ഒന്ന് . രുചി അറിയാത്തവര്‍ തികച്ചും രുചിക്കണം. ചായേ ചായ .

കേരളത്തിലുള്ളവര്‍ക്ക് സുപരിചിതമാണ് ചായക്കടയിലെ ചായ ഉണ്ടാക്കുന്ന രീതി . ഗ്ലാസ്സില്‍ ലേശം പാല്‍ ഒഴിക്കുന്നു, ഇത്തിരി പഞ്ചാര ഇടുന്നു . പിന്നിട് സഞ്ചിപോലെ തൂങ്ങി നില്‍ക്കുന്ന അരിപ്പയില്‍ ചായപ്പൊടിയിട്ടു ഗ്ലാസ്സിലേക്ക്‌ നീട്ടി ചൂടു വെള്ളം ഒഴിക്കുന്നു . അത് പിന്നീട് വേറൊരു പാത്രത്തിലേക്ക് ഒഴിച്ച് ആറ്റുന്നു. ഒന്നിലേറെ ചായയുണ്ടെങ്കില്‍ ഗ്ലാസ്സിനു പകരം രണ്ടു വലിയ പാത്രം തന്നെ ഉപയോഗിക്കുന്നു . ആറ്റുന്ന രീതി വിചിത്രം തന്നെ . ഇടതു കൈ ഇടത്തു താഴേയും വലത്തു കൈ വലതു ഭാഗത്ത് ഏറ്റവും മുകളിലും . മുകളില്‍ നിന്നു താഴോട്ടു ആറ്റുംപോള്‍, മഴവില്ലിന്റെ പാതി ഇടതുവശം പോലെ വളഞ്ഞാണ് വീഴുക . ഇതു കേരളത്തില്‍ മാത്രം കാണുന്ന ഒരു കലയാണ് . കളരിപയറ്റുപോലെ. ഗ്ലാസ്സില്‍ മുക്കാല്‍ ഭാഗം ചായയും കാല്‍ ഭാഗം പതയും . ചായ റെഡി . ഇത്തരത്തിലുള്ള ചായയാണ് നമുക്കു സുപരിചിതം . പക്ഷെ അവിടംകൊണ്ട് അവസാനിക്കുന്നില്ല. വേറേയും ഉണ്ട് പലതരം . നമുക്കു നോക്കാം .
ഗ്രാമങ്ങളിലും ടൌണിലും ഉള്ള ചായക്കടയിലും ഹോട്ടലിലും ചായ ഓര്‍ഡര്‍ ചെയ്യുന്നത് ശ്രദ്ധിച്ചിട്ടുണ്ടോ, പല പേരിലാണ് അവ അറിയപ്പെടുന്നത് . വിവിധ തരം ചായയും ഉണ്ട് . ഉദാഹരണമായി -ഒരു കാലി ചായ, അതായത് ചായ മാത്രം മതി , കടി (പലഹാരം) വേണ്ട . അല്ലാതെ കാലികള്‍ക്ക്‌ കൊടുക്കുന്ന ചായ എന്നല്ല അര്‍ഥം . ഒരു കട്ടന്‍ ചായ . ബ്ലാക്ക് ടീ എന്നര്‍ഥം . പാലിനെ ഒഴിവാക്കി . പിന്നെ ഒരു ചായ വിത്തൌട്ട് - പഞ്ചസാര ഔട്ട് എന്ന് സാരം . രസകരമായ മറ്റൊരു ചായയുണ്ട് വെള്ള ചായ അഥവാ പാല്‍ ചായ . പുകയിലയില്ലാതെ മുറുക്കുന്നതുപോലെ. ചായപൊടി ഇല്ലാത്ത ചായ . കിരീടം ഇല്ലാത്ത രാജാവ് . നോക്കു ചായ എന്ന പേരിന്റെ മഹിമ .

ഒരു നാലര ദശവര്‍ഷങ്ങള്‍ക്ക് മുമ്പാണ്‌ ഞാന്‍ ഗുജറാത്തിലെ ബാറോഡാ നഗരത്തില്‍ എത്തിയത് . അപ്പോളാണ് ചായക്ക്‌ വേറേയും പേരുകളുണ്ട് എന്ന് മനസ്സിലായത് . അവിടെ ടീ ഷോപ്പില്‍ ചെന്നു ചായ ചോദിച്ചാല്‍ കപ്പില്‍ ഒഴിച്ച് തരും ഒരു സാധാരണ ചായ. പിന്നെ ഒരു സ്പെഷല്‍ ചായ, അതില്‍ ധാരാളം പാലും പഞ്ചസാരയും ചായപൊടിയും എലക്കയും എല്ലാം ഉണ്ടായിരിക്കും . ഇതിന് ബാദഷാ എന്നും പറയും . രാജാവിന്റെ സ്ഥാനമാണ്‌ . മറ്റൊരിനം - ലസ്കരി. ഇതില്‍ മേല്‍പറഞ്ഞ സാധനങ്ങള്‍ക്ക്‌ പുറമെ ഇഞ്ചിയും ചേര്‍ത്ത് നല്ലപോലെ വെട്ടി തിളപ്പിച്ച്‌ (പായസംപോലെ) ഊറ്റി എടുക്കുന്നു . നല്ല കാഠിന്യമുള്ള ഒരിനം . ചൂടു ഭജ്ജിയും കൂടെ ആയാല്‍ അത്യുഗ്രന്‍ ,അങ്ങിനെ പല സ്ഥലങ്ങളിലും പല തരം ചായകള്‍ കാണം .
മുമ്പൊക്കെ പൊടിച്ചായ, ഇലച്ചായ എന്നീ രണ്ടുതരം ചായയെപറ്റി മാത്രമെ അറിയൂ . പൊടിച്ചായക്ക് കളറും കൊഴുപ്പും , ഇലച്ചായക്ക് സ്വാദും കൂടും . ഹോട്ടലില്‍ രണ്ടും ചേര്‍ത്ത്‌ കാര്യം നേടുന്നു . വിരലില്‍ എണ്ണാവുന്നത്ര ബ്രാണ്ടുകളും. ഈയിടെ ഒരു സൂപ്പര്‍ മാളില്‍ പോയി ചായ വാങ്ങാന്‍ , അവിടെ ഒരു ഭാഗം നിറയെ ചായ . ടാറ്റാ, ബ്രൂക്ബോണ്ട്, ആസ്സാംവാലി, ലിപ്ടന്‍ തുടങ്ങി പലപല കമ്പനികളുടെ ചായ . ഏതാ വാങ്ങാ . ശ്രദ്ധിച്ചു നോക്കിയപ്പോള്‍ അതിലും കഷ്ടം , ഓരോരോ കമ്പനികാര്‍ക്കും വേറെ വേറെ സ്വാദുള്ള ചായകള്‍ , ഗ്രീന്‍ , റെഡ് , നാച്ചുറല്‍, ഇലായ്ച്ചി(ഏലക്കായ) , ജിഞ്ചര്‍ (ഇഞ്ചി) ലെമണ്‍ (ചെറുനാരങ്ങ), മസാല , ജിഞ്ചര്‍ ഹണി(ഇഞ്ചി തേന്‍ ) എന്നിങ്ങനെ വിവിധ സ്വാദുകള്‍. എന്താ ചെയ്യാ . മാത്രമോ വിവിധ മണമുള്ളവ- റോസ് , മുല്ല തുടങ്ങിയവ . ഏതാ വാങ്ങാ . വയ്യേ വയ്യ . വീട്ടില്‍ തിരിച്ചുവന്നു . ബോറടിമാറാന്‍ ടീവി വച്ചു . വന്നു ടെലിമാര്‍ക്കററിങ്ങ്. നാനാവിധ അസുഖങ്ങള്‍ക്കും ചായ. പ്രെഷര്‍, പയല്‍സ്, ഹൃദ്രോഗം , അള്‍സര്‍ , തലവേദന മറ്റും മറ്റും . വിലയോ ഉഗ്രന്‍ . ഏത് ചായയാ ഇപ്പൊ കുടിക്ക്യാ . ചായ ഒരു ചെടിയല്ല - മരം തന്ന്യാ . വലിയ മരം കൊറേ ചില്ലകളുള്ള മരം . ഓരോ ചില്ലയിലും ഓരോ മോഡല്‍ ചായ . എന്റപ്പോ.

അങ്ങിനെ ചിന്താ കുഴപ്പത്തിലിരിക്കുംബോഴാണ് ഒരു ഔദ്യോദിക ടൂറ് . സ്ടാര്‍ ഹോട്ടലില്‍ താമസം .ഇനി നമുക്കു സ്റ്റാര്‍ ഹോട്ടലിലെ സ്ഥിതി നോക്കാം . അവിടുത്തെ മഹാന്മാര്‍ക്ക്‌ ഹോട്ടലില്‍ ഉണ്ടാക്കുന്ന റെഡി മെയ്ഡ് ചായ പദവിക്ക്‌ ചേരില്ല . അപ്പോള്‍ സെറ്റ് ചായ ഓര്‍ഡര്‍ ചെയ്യും . എന്താണീ സെറ്റ് ചായ . ഒരു ട്രെയില്‍ വെവ്വേറെ പാത്രത്തില്‍ ചൂടു വെള്ളം , പാല്‍, ടീ ബാഗ്‌ , പഞ്ചസാര എന്നിവ എത്തിക്കുന്നു . ആവശ്യാനുസരണം പദാര്‍ത്ഥങ്ങള്‍ ചേര്‍ത്തു ചായ ഉണ്ടാക്കി കുടിക്കുന്നു . പകുതി കുടിച്ചു ബാക്കി വെക്കുന്നു . മുഴുവന്‍ കുടിക്കാന്‍ സ്റ്റാറ്റസ് അനുവദിക്കില്ല . പക്ഷെ ചാര്‍ജ് ഒട്ടേറെ കൊടുക്കണം . പിന്നെ ടിപ്പും . ഇവിടെ വേറൊരു ചായ കൂടി കിട്ടും , കോള്‍ഡ് ടീ , തണുത്ത ചായ , ഇതിന് പാലും വേണ്ട . പക്ഷെ അത് ശരിയാവില്ല. ഓര്‍ഡര്‍ ചെയ്താല്‍ വേറെ ചായ കിട്ടുമോ . എങ്കില്‍ ഏത് ചായായ കുടിക്ക്യാ , വിലയോ ,മണമോ, സ്വാദോ ആരോഗ്യമോ സൌന്ദര്യമോ, പദവിയോ ഏതാ നോക്കാ . ഏത് ചായായ കുടിക്ക്യാ

1 comment:

ബാബുരാജ് ഭഗവതി said...

ചായ പുരാണക്കാരന് സ്വാഗതം