കുക്കുടം കൂവിയപ്പോള് കാക്കകള് കരഞ്ഞപ്പോള്
അര്ക്കനുദിച്ചപ്പോള് പ്രഭാതം വിടര്ന്നപ്പോള്
തര്ക്കമില്ലാതെയഹം ഗമിച്ചു പതിവുപോല്
പാര്ക്കിലേക്കുള്ള നടപ്പാതതന് ചാരത്തൂടെ
മുന്നിലൊരു വൃദ്ധന് മല്ലിട്ടു ഗമിക്കുന്നു
പിന്നിലെ ശ്വാവിന് ഗളചങ്ങല വലിക്കുന്നു
ഒന്നിച്ചു നീങ്ങാനൊട്ടും വഴങ്ങുന്നീലാ ശ്വാനന്
പിന്നോക്കവും ഇരു ഭാഗവും തത്തീടുന്നു
കണ്ടാലാരോഗ്യവും ശൌര്യവുമുണ്ടെന്നാലും
പാണ്ടനും മുറിവാലനുമാണാ മൃഗം
കണ്ടാലവനൊരു പാശ്ചാത്യപ്പിറവിതാന്
തൊണ്ടപൊട്ടീടും വണ്ണം മല്ലിട്ടു കുരക്കുന്നു
തല്ക്ഷണമെവിടുന്നോ പ്രത്യക്ഷപ്പെട്ടു പിന്നില്
വീക്ഷണത്തോടെ ചില സ്വദേശിപ്പിറവികള്
ലക്ഷണക്കേടാണല്ലോ ഓര്ത്തവര് മനതാരില്
വീക്ഷിച്ചകമ്പടിയെന്നോണം കൂടി പിന്നില്
നോക്കെടാ പാശ്ചാത്ത്യനെ വികലാംഗരല്ലാ ഞങ്ങള്
തക്കത്തില് വളഞ്ഞൊരു വാലിനെ ദര്ശിച്ചാലും
എക്കാലം ശ്രമിച്ചിട്ടും ജയിച്ചില്ലൊരുത്തനും
പൊക്കത്തില് നിവര്ത്താനും നേരെ നിര്ത്താനും മറ്റും
അരിശത്താല് മുറിവാലന് മുരണ്ടും മൂളിക്കൊണ്ടും
ഗൌരവത്തോടെ തെണ്ടിപ്പട്ടികളോടോതിയവന്
നേരിട്ടു വീക്ഷിക്കുവിന് ഉണ്ടെനിക്കെജമാനന്
നേരത്താഹാരവും സ്നാനവുംനല്കീടുവാന്
കഴുത്തില് ചെറിയൊരു ചങ്ങലയുണ്ടെന്നാലും
വാഴാനെനിക്കൊരു കൊച്ചു പാര്പ്പിടമുണ്ട്
മുഴുവന് ദിനമെന്നെ ബന്ധിക്കില്ലൊരിക്കലും
കഴുത്തിന് ചങ്ങലയൂരും രാത്രിയിലെന്നുമെന്നും
ഇറച്ചിയും പാലും മറ്റും സുഭിക്ഷമാണെനിക്കെന്നും
പാറാവാണെങ്കിലും ഖേദമില്ലൊരിക്കലും
വീറോടെ കുരച്ചു ഞാന് റോന്തുചുറ്റിയാല് പിന്നെ
കേറില്ലൊരുത്തനും എന് നാഥ ഭവനത്തില്
പേനില്ലെന് ശരീരത്തില് മറ്റു പ്രാണികളില്ലാ
ഗൌനിക്കാന് ആളുള്ളപ്പോള് പേടിക്കേണ്ടാ വൃഥാ
മേനിതന്നാരോഗ്യത്തിന് വ്യാകുലം വേണ്ടാ തീരേ
എനിക്കവര് ഇന്ജെക്ഷനും മരുന്നും നല്കീടുന്നു
തെണ്ടി പട്ടികള് ഒട്ടും തോറ്റില്ലവന് മുമ്പില്
തൊണ്ട പൊട്ടീടും വണ്ണം തിരിച്ചവരോതി
മണ്ടനാണെടാ നീയാകാരാഗൃഹത്തിലെന്നും
കൊണ്ടാലറിയണം ജീവിത ദൌര്ബല്യങ്ങള്
കുടുംബ ജീവിതമുണ്ടോ ഇഷ്ടഭാജനമുണ്ടോ
കടപ്പാടില്ലാതൊന്നു തെണ്ടുവാന് കഴിയുമോ
വീടില്ലെങ്കിലും ഞങ്ങള് തെണ്ടുന്നു സ്വതന്ത്രമായ്
ഇഷ്ട ഭോജനമാവാം ഇഷ്ട ഭാജനമാവാം
ആരെവേണേലും ഞങ്ങള്ക്കാക്കാം യജമാനന്
ആരുടെ നേര്ക്കും ഞങ്ങള് വാലാട്ടി സ്നേഹം കാട്ടും
ആരുടെ ഗൃഹത്തിലും ഭദ്ര നിദ്രയുമാവാം
ആരോടും ചോദിക്കാതെ രാപ്പകല് ഉറങ്ങീടാം
ഞങ്ങള്തന് സൌകര്യത്തില് അസൂയ തോന്നുന്നെങ്കില്
ഞങ്ങളോടൊപ്പം ചേരാന് ആഗ്രഹം തോന്നുന്നെങ്കില്
പൊങ്ങച്ചം വിട്ടു വേഗം ചങ്ങല പൊട്ടിച്ചോ നീ
ഞങ്ങളുണ്ടല്ലോ നിന്നെ സ്വാഗതം ചെയ്തീടുവാന്