മഞ്ഞിന്‍ കെടുതികള്‍ മാറി മെല്ലെ
കുഞ്ഞു പനിനീര്‍ ചെടികള്‍ മൊത്തം
കുഞ്ഞീ തളിരില പൊട്ടി വന്നു
മഞ്ഞിനെ തോല്‍പ്പിച്ച തൃപ്തിയോടെ
കൊച്ചു തളിരിപ്പോള്‍ ചോപ്പ് നിറം
പച്ചയായ് തീരാന്‍ കൊതിച്ചു നില്‍പ്പു
ഇച്ഛയാണങ്ങിനെ നോക്കി നില്ക്കാന്‍
കൊച്ചു കുഞ്ഞുങ്ങളെ എന്നപോലെ
മന്ദമായ് മാരുതന്‍ വീശിയപ്പോള്‍
മന്ദമായ് ചില്ലകള്‍ ചാഞ്ഞുലഞ്ഞു
സുന്ദരമായൊരു നൃത്തം പോലെ
വൃന്ദാവനത്തില്‍ കുരുത്തപോലെ
പാറി പറൊന്നൊരു കൊച്ചു പക്ഷി
കേറിയിരുന്നൊരു കൊച്ചു കൊമ്പില്‍
ഏറിയ ഭാരം കൊണ്ടായിരിക്കാം
ഏറെ കീഴോട്ടത് ചാഞ്ഞുലഞ്ഞു
ഇല്ലെനിക്കൊട്ടേറെ ശക്തിയിപ്പോള്‍
ചില്ലകള്‍ പച്ചയിലകള്‍ പൂക്കള്‍
നല്ലപോല്‍ വന്നു നിറഞ്ഞ ശേഷം
എല്ലാവരേയും ഞാന്‍ ആദരിക്കാം
ഉണ്ടായോരിത്തിരി ചില്ല മെല്ലെ
കണ്ടാലഴകുള്ള പുഷ്പമേറെ
തെണ്ടി രുചിച്ചു രസിച്ചു പാറും
വണ്ടുകള്‍ ചുംബിച്ചു തേന്‍ കുടിക്കും
ആരെന്റടുത്തു വന്നെത്തിയാലും
സൌരഭ്യം കൊണ്ടു മയക്കി നിര്‍ത്തും
ആരെങ്കിലും ചിലര്‍ നുള്ളിയെന്നെ
കോരിയെടുത്തങ്ങു നിശ്വസിക്കും
സന്തോഷ വേളക്ക് മാറ്റ് കൂട്ടാന്‍
ചന്തത്തില്‍ ബൊക്കെ ചമഞ്ഞെടുക്കും
സന്താപമാണേലും ചിന്ത വേണ്ട
ചന്തമായ് റീത്തു ചമഞ്ഞെടുക്കാം
ദേവന്റെ കണ്ഠത്തില്‍ മാല്യമാകാം
ദേവന്റെ പാദത്തില്‍ പൂജാപുഷ്പം
വീണ്ടുംഞാന്‍ മഞ്ഞില്‍ അകപ്പെടുമ്പോള്‍
ചാവാതെ രക്ഷിച്ചനുഗ്രഹിക്കു
No comments:
Post a Comment