ഇമ്പമാം സ്മരണകള് താലോലിച്ചുണരുന്നു
സപ്തതി ആഘോഷിച്ചു നിര്വൃതിപൂണ്ടു പക്ഷെ
കേവലം മോഹങ്ങള്തന് ചുരുളുകളഴിയുന്നു
പ്രഭാതം വിടരും മുമ്പേ ശംഖൊലി മുഴങ്ങവേ
പ്രഭാവത്തോടെ ശംഖിന് ഓംകാരമൂതാന് മോഹം
കുളിരേകും പ്രഭാതത്തില് ഭൂതകാലത്തെപോലെ
കുളത്തില് കുളിക്കാനും നീന്താനുമതിമോഹം
വിറക്കും കരങ്ങള് പക്ഷെ ഇടക്കയില് ശ്രുതിമീട്ടി
നിറഞ്ഞ ഭക്ത്യാ കൊട്ടി പാടുവാനൊരു മോഹം
ഉത്സവം വരുന്നേരം പ്രമാണിയായി തന്നെ
ഉത്സാഹത്തോടെ പാണ്ടി പഞ്ചാരി കൊട്ടാന് മോഹം
കസേര ഹസ്തങ്ങളില് കൈവിരല് താളം മീട്ടെ
രസമായ് കേളിയേറും കേളി കൊട്ടുവാന് മോഹം
പഞ്ചവാദ്യത്തിന് നാദം കര്ണത്തില് പതിക്കവേ
മൊഞ്ചേറും ടീമിന് മദ്ധ്യേ താനാവാനൊരു മോഹം
വാതവും നീരും പൂണ്ട കാല് മുട്ടില് ചെണ്ട താങ്ങി
മതിയാവോളം കൊട്ടി പൊന്നാട വാങ്ങാന് മോഹം
സരസ്വതി വിലാസങ്ങള് തിമല ചെണ്ടയില് കേള്ക്കെ
സരസമായതിന്മീതെ ഒന്ന് കൈവെക്കാന് മോഹം
നടക്കാന് വയ്യെന്നാലും വാദ്യക്കാര്ക്കിടെ മെല്ലെ
കോടിയും തോളിലിട്ടു വിലസാനൊരു മോഹം
ഉണ്ടല്പം പ്രമേഹവും മരുന്നുകള് എന്നാകിലും
ഉണ്ടെണീക്കും മുന്പേ പായസമു ണ്ണാന് മോഹം
വെറുതെയിരിക്കുമ്പോള് മയങ്ങാന് തോന്നും പക്ഷെ
ഉറക്ക ഗുളികകള് വര്ജിച്ചുറങ്ങാനൊരു മോഹം
വെപ്പു പല്ലാണെങ്കിലും കൂട്ടുകാരോടൊപ്പം നന്നായ്
ഉപ്പേരി കടിക്കാനും സ്വാദറിയാനും മോഹം
പ്രഷറുണ്ടെന്നാകിലും സാമാന്യം അമ്ലം ചേര്ത്തു
ദോഷങ്ങള് മറന്നല്പം കറികള് കൂട്ടാന് മോഹം
മക്കളെല്ലാം തന്നെ സന്ദര്ശിച്ചന്വേഷിക്കേ
മക്കളില് ചിലര് കൂടെ വേണമെന്നൊരു മോഹം
കാഴ്ച്ച കുറവെന്നാലും ദ്വൈമാസ നിര്മാല്യത്തെ
വീഴ്ച്ച കൂടാതെ നന്നായ് വായിക്കാനൊരു മോഹം
വാര്ദ്ധക്യ സഹജമാം അപ്രിയ ചാപല്യങ്ങള്
വര്ദ്ധിക്കും മുന്പേ ജന്മസായൂജ്യം തേടാന് മോഹം
No comments:
Post a Comment